പയ്യാവൂർ ടൌണ് സെൻറ് ആൻസ് ഇടവക സമൂഹത്തിന്റെ ഇടയനും യുവജനങ്ങളുടെ മിത്രവും കെ. സി. വൈ. എൽ. പ്രസ്ഥാനത്തെ നിർലോഭം പ്രോത്സാഹിപ്പിക്കുന്ന ചാപ്ലിനും ആയ കരിമ്പിൽ ബഹു. ലൂക്കാച്ചൻ തൻറെ പൌരോഹിത്യ ജീവിതത്തിന്റെ രജത ജൂബിലി വർഷത്തിലേക്ക് പ്രവേശിച്ചിരിക്കുന്നു. 1991 ഡിസംബർ 27 നു അഭി. കുന്നശ്ശേരി പിതാവിൽ നിന്നും തിരുപ്പട്ടം സ്വീകരിച്ച് തുടർന്ന് വിവിധ ഇടവകകളിൽ ശുശ്രൂഷ ചെയ്ത് കഴിഞ്ഞ 6 മാസമായി പയ്യാവൂർ ടൌണ് പള്ളി വികാരിയായി സേവനം ചെയ്തുകൊണ്ടിരിക്കുന്ന അച്ചൻ മടമ്പം ഫൊറോന പള്ളി ഇടവകാംഗം ആണ്. കഴിഞ്ഞ ഞായറാഴ്ച ദിവ്യബലി മദ്ധ്യേ ഫാ. ജിബിൽ കുഴിവേലിൽ, ഫാ. ജേക്കബ് മൂരിക്കുന്നേൽ എന്നിവരുടെ സാന്നിധ്യത്തിൽ ദീപം തെളിയിച്ചു കൊണ്ട് അച്ചൻ ജൂബിലി വർഷത്തിനു തുടക്കം കുറിച്ചു. മടമ്പം മേരി ലാൻഡ് ഹൈസ്കൂളിൽ സാമൂഹ്യ ശാസ്ത്ര അധ്യാപകനായി ജോലി ചെയ്യുന്ന അച്ചൻ മികച്ച സംഘാടകനും ഉജ്ജ്വല വാഗ്മിയും നല്ലൊരു ഗായകനും ആണ്. ടൌണ് ഇടവക സമൂഹത്തിന്റെ ഹൃദയ തുടിപ്പുകളെ തൊട്ടറിഞ്ഞ് ആത്മീയ ഔന്നത്യത്തിലേക്ക് നമ്മെ കൈപിടിച്ച് ഉയർത്തിക്കൊണ്ടിരിക്കുന്ന ഞങ്ങളുടെ പ്രിയപ്പെട്ട ലൂക്കാച്ചന് ജൂബിലി വർഷത്തിന്റെ പ്രാർഥനാ മംഗളങ്ങളും ദൈവാനുഗ്രഹങ്ങളും സ്നേഹപൂർവ്വം നേരുന്നു.
